Idagdagadag ti grupo a Federation of International Cable TV and Telecommunications Association of the Philippines (FICTAP) kenni President Ferdinand “Bongbong” Marcos Jr. nga i-veto ti Senate Bill No. 2699, wenno ti Konektadong Pinoy Bill, iti baet ti saan a narisut a pakaseknan.
Sigun kenni FICTAP National Chair Estrellita Juliano-Tamano, kayatna paylaeng a marisut a nalaing dagiti pakaseknan, isut rason a nu mabalin ket i-veto daytoy ti presidente.
Ti gakat a maaw-awagan nga Open Access Transmission Act ket naaprobaranen iti maikatlo ken pinal a pannakaibasa babaen ti Senador idi Pebrero a singko.
Panggep ti gakat a mapalaka a sumrek dagiti mangipapaay iti serbisio iti merkado, mangparang-ay iti kompetision, ken mangipaay kadagiti gumatgatang iti ad-adu a pagpilian ken makabael a serbisio iti internet.
Nupay kasta, inyebkas ti FICTAP ti pakaseknanda maipapan iti daytoy ken impapilit ti nasao a grupo a rumbeng latta a sanguen dagiti telecommunication companies ti “liabilities” no mapaay.
Iti sidong ti maisingsingasing a wagas, ti DICT ken ti National Telecommunications Commission (NTC) ket agtitinnulong a mangtinir ken mangpabaro ti centralized database ti data transmission infrastructure.
Naimandato pay iti Philippine Competition Commission (PCC) ken ti NTC a mangisigurado a patas, nainkalintegan, ken non-discriminatory wenno saan a mangidumduma.
Idi laeng Enero, sinertipikaran ni President Marcos ti nadakamat a gakat kas “urgent.”
