Imbutaktak ni Department of Public Works and Highways (DPWH) Secretary Vince Dizon a maysa kadagiti ub-ubraen a panagmanipula dagiti daduma a kontraktor ti panagaramidda iti report a mangibagbaga a nalpasen dagiti proyekto iti baet a kagudwa paylaeng ti naaramid.
Daduma pay kadagitoy ti addaanen iti final report kadagiti proyekto a saanda pay a narugyan.
Ti nasao a modus ket imbinglay ni Dizon kabayatan ti panagdengngeg iti Senate Blue Ribbon Committee idi laeng kalman maibasar iti impatungpalda nga inisyal nga inspeksyon.
Gapu iti dayta, agbanag nga maipaay ti sibubukel a gatad iti kontrata kadagiti kontraktor uray kagudwa wenno awan pay narugyanda kadagiti iggemda a proyekto.
Mainaig iti dayta, kinuna ni Dizon nga adda iti mapaspasamak a panagkukumplot ken panagnumar dagiti kontratista iti nasao a sistema.
Innayon ti opisyal a nupay dagiti naduktalanda nga isyu ket napasamak kadagiti proyekto idiay Bulacan, kinunana a mapaspasamak metlaeng daytoy kadagiti sabali pay lugar.
