BAGUIO CITY — Ipangruna ti Baguio City Fire Station ti panakabukel ti fire brigade kadagiti amin a babbarangay ditoy siudad ita a tawen.
Iti panakiyuman ti Bombo Radyo kenni Fire Chief Inspector Nestor Gorio, dadaulo ti nasao nga opisina, kinunana a nasken a tunggal barangay ket adda ti mabukel a fire brigade a nakasagana nga agresponde a dagus no adda ti mapasamak nga uram iti masakupanda.
Inladawanna a dagiti miembro ti barangay fire brigade ket ‘on-call’ no adda ti uram ken maipasidong dagitoy kadagiti panagsanay dagiti bombero a pangadalanda iti panagaramat ti fire extinguisher ken ti panagsebseb iti puor babaen iti danum.
Dinakamatna a ti nasao a panggep ket paset ti addangda tapnu manayonan ti pwersada nga agresponde no adda ti mapasamak nga uram iti nagduduma a paset ti siudad.
Naamuan nga ita laeng a bulan ti Enero ket uppat nga insidente ti uram ti rinespondean dagitoy iti nagduduma a paset ti siudad.
Kabayatanna, impannakkelna a posible nga inton Marso ket malpas metten ti konstruksion ti sub-station ti City Fire Station sadiay Quirino Hill tapnu adda ti mainayon iti sub-station dagitoy sadiay Irisan ken Aurora Hill.
