BAGUIO CITY – Inlawlawag ni Atty. Rhenan Diwas, dadaulo ti City Environment and Parks Management office a ti first aid booth a naimuntar iti Burnham Park nga aggatad iti P4.7 Million manipud iti Tourism Infrastructure and Enterprise Zone Authority (TIEZA) ket agserserbi kas extension ti Smart Command Center iti siudad ti Baguio.
Sigun kenni Atty. Diwas, numan pay ti features nga adda iti booth ket heart beat monitoring ken stretchers, adda ti button sadiay a mabalin a pinduten a konektado iti command center para iti inyaman nga emergency medical assistance kas iti nasugatan ken daduma pay.
Addaan metlaeng daytoy ti CCTV iti uneg a konektado metlaeng iti command center.
Innayun daytoy a saan a nasken a maikabil amin a kits sadiay gapu iti features ti nasao a first aid booth.
Nupay kasta, ad-adalenda ti pannakkaikabil ti kanayunan a bandages a pondoan ti LGU.
Iti agdama, adda pay dagiti kanayunan a features a manarimaan nga ikabilda sadiay kas iti solar panel ken dadduma pay ngem mabalin ladta nga aramaten.
Kabayatanna, ti booth nga adda iti Burnham park ket 24/7 bayat a ti maimunmuntar sadiay Bayan park ket depende iti operation time ti nasao a parke.
Impeksa ni Diwas nga adda ti dua a park rangers nga isu ti nadutukan nga agrikus iti parke ken mangsukimat metlaeng iti booth.
Maipalagip nga idi July 9, 2026, naipatungpal ti ceremonial turnover ti nasao a booth no sadino, addaan daytoy iti pondo nga agarup P4.7 Million a proyekto ti TIEZA.//Bombo Noveh Organo
