BAGUIO CITY – Maiyakar metlaeng dagiti flower stalls iti deppaar ti Harrison Road ditoy siudad ti Baguio iti kabiitan a panawen.
Inwaragawag daytoy ni Councilor Philian Weygan-Allan, chairman ti committee on market, trade, commerce and agriculture iti City Council kagiddan ti panangilawlawagna a tarigagayda a madalusan dagiti sidewalks sadiay Harrison Road.
Kinunana a dagiti nasao a flower stalls iti sidewalk ti Harrison Road ket maiyakar kasaruno ti panaginspeksion sadiay ni Mayor Benjie Magalong ita a lawas.
Dinakamatna a suportadoda met ti nasao nga addang isut gapuna a mangipasada iti kaskenan a linteg.
Maipalagip a dumanon iti dua a dosena a flower stalls ti pinalubusan ti lokal a gobyerno ti siudad nga agpwesto ken agilako iti nasao a sidewalk ti Harrison Road.
Dinakamat ti konsehal a maisagana ti abay ti Ganza Parking Area tapnu sadiay ti temporaryo a pagakaran dagiti flower vendors bayat nga agbirbiruk ti lokal a gobyerno iti permanente a pagakaran dagiti nasao a flower vendors.
Naituding nga agtaripnong ti lokal a gobyerno ken dagiti maseknan a flower vendors inton sumaruno a lawas para iti panakatalantan ti nasao nga addang.
