BALBALAN, KALINGA – Manarimaan ti follow-up investigation dagiti otoridad sadiay Balbalan Proper, Balbalan, Kalinga.
Kasaruno daytoy ti napasamak nga engkwentro iti nagbaetan ti 54th Infantry Division ken Komiteng Larangang Guerilla Baggas iti alas sais ti agsapa ita nga aldaw iti nasao a lugar.
Iti interview ti Bombo Radyo kenni PCpt. Tyrone John Balanay, Acting Chief of Police ti Balbalan Municipal Police Station, maatap a sabaten kuma dagiti rebelde ti rasyon iti nasao a lugar idi masabatda ti kameng ti Army.
Awan met ti nadangran wenno pimmusay iti nasao nga engkwentro.
Kinuna pay ni PCpt. Balanay a tallo a battalion ti adda iti nasao a lugar tapno masigurado ti kinatalged dagiti umili kontra kadagiti rebelde.
Impasiguradona met ti seguridad ken kinatalged ti komunidad ken tapno mapagtalinaed ti insurgency free iti nasao a barangay.
Kabayatanna, maysa a miyembro ti Communist Terrorist Group (CTG) ken Vice Squad Leader of Squad Uno iti Kilusang Larangang Gerilya (KLG) Baggas ti naispal dagiti otoridad idiay Sitio Saleng, Balantoy, Balbalan, Kalinga idi kalman, Hunyo 6.
Nabigbig daytoy a ni Gap-idan Bawit, nailista kas no. 9 wanted person iti Periodic Status Report Threat Group (PSRTG) para iti 4th Quarter 2023.
Maatap a nadangran ti nasao a rebelde iti napasamak a rinnupak iti nagbaetan ti army ken rebelde idiay Sitio Dangga, Balbalan, Proper, Kalinga idi May 31.
Naiserbi kenkuana ti warrant of arrest gapu iti kaso a Murder, Frustrated Murder ken Attempted Murder ken awan ti naipaay a piyansa para iti panakawaya-wayana.
Malaksid iti dayta, narekober dagiti otoridad ti sumagmamano nga alikamen dagiti rebelde iti nakapasamakan ti insidente idi Mayo 31.//Bombo Marinel Rodrigo
