Kidkiddawen dagiti agarup 170 a non-government organizations ti pannakaisardeng ti food aid distribution scheme a supsuportaran ti US ken Israel gapu kadagiti pakaseknan a mangikabil daytoy kadagiti sibilian iti peggad idiay Gaza.
Kasaruno daytoy iti ipupusay dagiti agarup 500 a tattao gapu iti mass shooting iti asideg ti pakaiwarwarasan dagiti tulong manipud nagrugi ti Gaza Humanitarian Foundation idi May 2025.
Gapu iti dayta, nagpirma dagiti agarup 170 a charities para iti awag a maipasardeng ti Gaza Humanitarian Foundation scheme ken maisubli ti naurnos a pannakaipaay ti tulong babaen iti United Nations.
Sigun met iti Gaza Humanitarian Foundation, abrasaenda dagiti dadduma a humanitarian groups a tumulong ken mangpakan kadagiti tattao idiay Gaza, imbes nga agsusupiat ken mang-insulto.
