LOS ANGELES — Nakedngan iti pannakaibalud iti sangapulo ket lima a tawen ti drug dealer a ni Jasveen Sangha, a pagaamo kas “Ketamine Queen,” seknan iti “overdose” a nakatayan iti “Friends” star a ni Matthew Perry idi 2023.
Inaklon ni Sangha ti panangilakona iti ketamine a naited iti aktor.
Sigun iti korte, daytoy ti nangsuplay iti iligal a droga ken intudok ti personal assistant ni Perry.
Nabirukan nga awanan ti biag ni Perry iti pagtaenganna kalpasan a naawanan iti puot ken nalmes, kas maibasar iti autopsy a mangibagbaga a gapu daytoy iti epekto iti ketamine.
Ad-adda a nadagsen ti sentensia ni Sangha nu idilig iti dadduma a karaman iti kaso. Kinuna pay iti korte nga agtultuloy paylaeng ti panangilakoda iti iligal a droga uray nalpasen ti insidente.
Sakbay a makedngan, nagkiddaw iti pammakawan ni Sangha ken inaklonna dagiti nagbiddutanna.
