BAGUIO CITY – Pimmusay ti maysa a foreign national a nursing student kalpasan a nagsagrap iti nakaro a dunor iti panangdungpar kenkuana ti maysa a taxi sadiay Magsaysay Avenue, Baguio City idi malem kalman.
Nabigbig ti biktima a ni Oreoluwa T. Oyinloye, 29-anyos, Nigerian National, BS nursing student sadiay AMA Baguio campus.
Maibasar iti inisial a report, nagtaud ti taxi nga imanmaneho ni Julio Goloyogo Balangue iti maysa a gasoline station sadiay Upper Magsaysay ken idi agturong iti bangir a kalsada ket nadungparna ti biktima.
Kinuna ti imbestigador a saan a nagsardeng ti taxi ken nagdirdiretso iti baba agingga a nadungpar daytoy ti maysa pay a taxi.
Naitaray ti biktima iti maysa a pagagasan para iti panakataming daytoy ngem naideklara a dead on arrival gapu iti nakaro a dunor daytoy.
Iti agdama ket agtultuloy pay laeng ti imbestigasyon dagiti otoridad ken iti panangurayda iti statement dagiti testigo nu kasanu a napasamak ti nasao nga aksidente.
