Pampaggepen ti uppat a House joint Committees nga imbitiran ni sigud a president Rodrigo Duterte iti hearing, gapu iti mapapati nga extrajudicial killings bayat ti administration daytoy iti war on illegal drugs operations.
Kasaruno daytoy iti kinuna ni sigud nga Ilo-ilo City Mayor Jed Mabilog a karaman ti naganna iti narcolist gaputa saan a supporter daytoy ni Duterte idi 2016 Elections.
Sigun pay kenni Mabilog, pinaayaban daytoy ni sigud a Philippine National Police Chief Ronald Bato Dela Rosa iti Camp Crame a posible a mangipaay iti peggad kekuana.
Gapu iti dayta, kinuna ni Manila lawmaker Benny Abante, co-chairman iti House Quad Committee nga imbitaranda ni Duterte tapno sungbatanna dagiti nasao nga aligasion kontra kenkuana.
Innayon pay ni Abante nga imbitaranda ni Duterte, tapno maamuan dagiti mastermind iti likudan iti extrajudicial killings bayat ti administrasion daytoy.
Inyunay-unay met ti nasao nga opisial a saanda nga akosaran ken saanda nga ikonkonsidera daytoy a perpetrator, no diket kayatda laeng nga ilawlawag daytoy ti napasamak iti war on drugs a nakatayan dagiti rinnibu nga indibidual.
