Mailukat inton malem para iti publiko dagiti fountains idiay Rose Garden, Burnham Park bayat a maiyuswat met ti An Enchanting Baguio Christmas inton Hueves, November 28 iti kapada metlaeng a parke.
Iti panakiuman ti Bombo Radyo kenni Baguio Ciy Mayor Benjamin Magalong, awan ti kasapulan nga isimpa kadagiti plano gapu ta nagbalin a naballigi daytoy idi napan a tawen nu sadino, kapada metlaeng a security plans iti maaramat para ita a tawen.
Nupay kasta, inaklonna a maysa kadagiti pangngepda a liklikan ti nalabes ken saan a naurnos a panagdudupadop dagiti indibidwal a mabalin a makapagpataud iti panakadangran iti tunggal maysa.
Dayta ket gapu iti manamnma manen a panagado dagiti turista nga sumarungkar iti siudad bayat iti Yuletide Season.
Malaksid iti dayta, kinuna ti Mayor Magalong nga agbalin manen a maysa a pakaseknan ti gunay iti trapiko gapu ta kagiddan ti manamnama a panagadu iti turista ket ti nadagsen metlaeng a gunay iti trapiko.
Mainaig iti dayta, dinakamat ti mayor ti Smart Urban Mobility Project a mabalin a makatulong iti panakaimanihar iti gunay iti trapiko.//Bombo Jez Lapizar
