Manamnama a mapasaran ti frost wenno andap kagiddan ti panagbaba ti temperatura sadiay Atok, Benguet.
Iti pannakiuman ti Bombo Radyo kenni Atok Mayor Franklin Smith, kinunana a mapaspasaran sadiay itan ti temperatura nga agay-ay-ayam iti 7 agingga 8 degree celcious.
Iti baet dayta, nakasagana met dagiti otoridad sadiay a mangmonmonitor iti temperatura.
Mainaig iti dayta, imbinglay ti nasao a mayor a nakasagana met dagiti mannalon sadiay ken ammodan dagiti nasken nga aramidenda nangruna no adda ti andap.
Kinunana a ti maysa nga ar-aramiden dagiti mannalon no adda ti andap ket masapada nga agsibog tapno marunaw dagitoy a makadadael kadagiti mula dagitoy.
Impettengna pay a makikoordinar dagitoy kadagiti lugar a prone iti andap agsipud ta daytoy ti pagaayat dagiti turista tapno itarimaan dagiti pagpardaan.
Adda metlaeng dagiti dadduma a panggep dagitoy tapno ad-adda pay a mapapintas ti nasao a munisipyo.
Kagiddan iti dayta, agtultuloy latta ti panagsangbay dagiti turista sadiay nangruna ita a bumabbaba ti temperatura.
Gapu iti dayta, nagpalagip daytoy kadagiti umili tapno ragsakenda latta a mangpasangbay kadagiti turista, kasta metten nagpalagip daytoy kadagiti turista nga agturturong sadiay tapno agkawesda kadagiti napupuskol a bado tapno maliklikan nga agkasakit agsipud ta nalem-ek unay ti temperatura sadiay.
