BAGUIO CITY – Mangnamnama ni Roel Velasco, maysa a coach ken bronze medalist iti 1992 Barcelona Olympics a maipasa iti senado ti maisingsingasing a gakat maipapan iti panakaipaay ti lifetime monthly pension nga agarup P15-K kadagiti amin a retirado a Filipino Olympians.
Daytoy ket kas maibasar iti House Bill 3523 a mangpangpanggep a mangipaay ti pension kadagiti atleta nga agtawen iti singkwenta agpangato.
Iti panakiuman ti Bombo Radyo kenni Velasco, maragsakan daytoy iti nasao a gakat gapu ta maysa daytoy a wagas tapno maipaayan ti pammadayaw dagiti amin a retirado nga atleta iti pagilian.
Sigun kenni Velasco, dakkel a tulong daytoy gapu ta makatulong iti kasasaad dagiti atleta bayat ti panagikkatda iti propesyon dagitoy.
Namnamaenna pay a makaipaay daytoy ti motibasyon wenno inspirasyon kadagiti atleta tapno saysayaatenda ti panag-ensyoda ken ti panagpanggepda a makastrek iti Paris Olympics, saan laeng nga iti Asian Games.
Kabayatanna, kinuna ni Velasco a dagiti atleta ita a gundaway ket naswerte gapu ta addan dagiti linteg maipapan iti benipisyo dagitoy.
Impeksa pay ni Velasco nga iti panagbalin daytoy kas maysa a coach ket panggepna nga isuroan dagiti atleta a manpangpanggep nga agbalin kas maysa a boksingero ken wagasna daytoy tapno agserbi iti pagilian.//Bombo Mera Pacpacan
