Impila ni Benguet Congressman Eric Go Yap ti gakat iti Kamara a mangsalaknib kadagiti freelancers manipod iti labor violations.
Ti gakat ket ti House Bill No. 2856 wenno ti Freelance Workers Protection Act.
Karaman iti probisyon daytoy ti rumbeng a pannakaadda iti kontrata iti nagbaetan dagiti freelancers ken dagiti kliyente dagitoy nu sadino, kasapulan metlaeng a nalawag a nakalanad iti daytoy ti terms of work, payment ken deadlines tapno maliklikan ti saan a panagkinaawatan dagiti maseknan.
Sigun kenni Congressman Yap, naobserbaran a makapaspasar dagiti freelancers iti saan a patas a panagtrato ken saan a nalawag a work agreements.
Innayonna a nu awan iti ligal a nakaibasaran tapno masalakniban dagiti freelancers a kas kadagiti regular nga empleyado, agtultuloy a mapasaranda dagiti parikut a kas iti pannakaitantan ti pamastrekan, saan a patas a tax practices, ken kinaawan iti benepisyo kas iti paid leave wenno iti healthcare.
Sumagmamano kadagiti kadawyan a freelancers ket dagiti graphic designers, writers, virtual assistants, ken dagiti programmers.
Malaksid iti dayta, panggep pay ti nasao a gakat a maipaayan dagiti freelancers iti kanayonan a benepisyo kas iti hazard pay ken night differential.
Iti bileg daytoy, manamnama a maipaayan iti pannusa dagiti aglabsing wenno dagiti saan nga agtulnog iti nakalanad iti kontrata.
Daytoy ket tapno mapasayaat ti kasasaad wenno agbalin nga ad-adda nga ethical ti freelance market iti pagilian para kadagiti mangmangged a mangayat iti flexible a wagas iti panagtrabaho.
