Mabalin itan a maipaayan iti “clearances” dagiti ganggannaet a nangged iti Philippine Offshore Gaming Operators (POGO) a sumangsango iti deportation iti uneg ti maysa laeng nga aldaw, sigun ti Bureau of Immigration (BI).
Daytoy ket kalpasan nga inulit ti Bureau of Immigration (BI) ti panagkumitna para iti napartak a “deportation” dagiti ganggannaet nga empleado a nairaman iti iligal nga operasion ti POGO.
Sigun kenni Immigration Commissioner Joel Anthony Viado, nu nabayag ti panagtalinaedda iti pagilian nga agur-uray kadagiti naituding a “deportation” dagitoy, ad-adda a dakkel a gatad ti mabusbos ti gobierno iti pannakaibaludda.
Gapu iti dayta, prayoridadda a maipasubli iti kabiitan a panawen dagiti nasao nga indibidual.
Dagiti tallo a dokumento a kasapulan para iti “deportation” dagiti ganggannaet ket maysa a valid passport wenno travel document, maysa a clearance manipod iti National Bureau of Investigation (NBI) a mangkumpirmar nga awan ti aniaman a pending a kaso, ken maysa nga outbound ticket.
Tapno napartak ti proseso ti pannakaisubli dagiti ganggannaet, nakikoordinaren ti Immigration Bureau iti National Bureau of Investigation a patganda a mangipaulog ti “clearances” iti maysa laeng nga aldaw.
Sigun iti pannakangiwat ken direktor ti Presidential Anti-Organized Crime Commission (PAOCC) a ni Winston Casio, agtaltalinaed paylaeng iti Pilipinas ti 10,650 a ganggannaet a nagtigged iti Philippine Offshore Gaming Operators, kas maibasar iti kaudian a datos.
Dumanonen iti dua a ribo a nagtigged ket naipasublin kalpasan a nakemmegda gapu iti iligal nga aktibidad.
Daytoy ket sumagmamano a bulan kalpasan ti deadline para iti pannakaipawil ti operasion ti POGO idi Disiembre idi napalabas a tawen kas maitunos iti direktiba ni President Ferdinand “Bongbong” Marcos Jr. a mangipawil ti online gambling iti Pilipinas.
