BAGUIO CITY – Nasuspindir ti panakaipatungpal ti Season 33 ti Baguio-Benguet Educational Athletic League (BBEAL).
Sigun kenni Tournament Commissioner Eduardo Laureano, kasapulan a maipatungpal ti indifinite suspension kadagiti ay-ayam iti BBEAL Season 33 tapno maipangruna ti kinatalged dagiti atleta manipud iti pangta ti COVID 19.
Kinunana a rumbeng laeng nga agtulnog dagitoy iti pammilin ni Pres. Rodrigo Duterte kagiddan iti panakaipasidong ti entero a pagilyan iti public health emergency gapu iti COVID-19.
Maipalagip a karaman kadagiti nasken a masuspendir ti panaka-organisa dagiti nagduduma nga aktibidad a paka-urnongan dagiti tattao.
Maipalagip pay a nangipatungpal iti lockdown ti Philippine Military Academy ken naipawil ti iruruar dagiti atleta daytoy ken iti panakipasetda kadagiti nakalinya nga ay-ayam ti nasao a collegiate league.
Agserserbi kas host ti BBEAL 2020 ti Cordillera Career Development College ken ditoy a makipaset dagiti nagduduma nga unibersidad ken kolehiyo a pagadalan iti Baguio ken Benguet.
