BAGUIO CITY – Nakasagana nga agtulnog ni ACT-CIS Partylist Representative ken Benguet Caretaker Congressman Eric Go Yap iti agbalin a panggeddeng ni incoming House Speaker Marinduque Rep. Lord Allan Velasco no masukatan daytoy kas caretaker congressman ti probinsya ti Benguet.
Sigun kenkuana, awan ti maaramidanna iti kanito nga agdesisyon ni Velasco iti nasao a banag gaputa maysa a bileg ti Speaker ti Kamara ket ti mangdutok iti maysa a caretaker congressman.
Inlawlawagna a nupay nagkari ni Velasco iti sangwanan ni Pres. Rodrigo Duterte nga awan ti masukatan kagaditi chairmanship iti Kamara ket posible latta nga agpatugaw ni Velasco kadagiti kaalyado daytoy.
Nupay kasta, impasigurado ni Yap a masukatan man wenno saan ket agtultuloy latta ti ipaayna a serbisyo ken tulong kadagiti umili ti Benguet.
Kinunana a daytoy ket gaputa manipud nadutukan kas caretaker ti Benguet ita a tawen ket adu a proyekto ken programa ti pinunduan ti opisinanan para iti pagkasupalan dagiti umili.
Maipalagip a nagtugaw kas caretaker congressman ti Benguet ni Yap idi Enero ti agdama a tawen kalpasan ti panangdutuk kenkuana ni House Speaker Alan Peter Cayetano kasaruno ti ipupusay ni daydi Benguet Cong. Nestor Fongwan Sr. idi Disyembre 2019.
