Mananmama a manayunan ti garbage truck iti munisipyo ti La Trinidad.
Sigun kenni Arthur Pedro, dadaulo iti Municipal Environment and Natural Resources ti La Trinidad, Benguet, kasapulan a manayunan dagiti pito a garbage truck a mar-aramat iti agdama tapno naparpartak ti panakaakup ti basura kadagiti nagduduma a barangay.
Dinakamat ni Pedro a manarimaanen ti panangiproseso dagiti maseknan nga opisyales Iti panakagatang ti maysa a yunit ti nasao a truck.
Kagiddan dayta, inlawlawagna a saan a maitantantan ti panakakolektar ti basura kadagiti naguduma a collecting areas sadiay La Trinidad gapu ta masursurot ti naituding nga iskedyul.
Inaklonna a nupay mangituntunda ti nailet a gunay ti trapiko ti panagkolektar ti basura, maimanmaniharda latta daytoy a naimbag.
Sigun pay iti opisyal, adda ti kooperasyon dagiti umili seknan iti panagtulnog dagitoy iti iskedyul ti panangiruarda kadagiti basurada, kasta met a sumagmamano laengin ti maimonmonitor nga agibelbelleng paylaeng ti basurada iti karayan.
Mainaig iti dayta, umap-apela ni Pedro kadagiti umili iti naan-anay a panagtulnog dagitoy seknan iti panagdalus iti aglawlaw nangruna ti umno a panangimaniharda kadagiti basurada tapno maliklikan ti posible a panaglayos bayat a mangrugin ti La Niña Phenomenon.//Bombo Razced Pagoli
