BAGUIO CITY – Dumamon iti nasurok P100,000 ti gatad ti nauram a paset ti art installation sadiay Upper Session Road kalpasan nga inuram daytoy ti saan paylaeng a nabigbig nga indibidual idi parbangon kalman.
Sigun kenni SFO4 Nelson Duwagan, imbestigador ti Bureau of Fire Protection – Baguio, naibasar ti gatad iti pattapatta ti artist a ni Maela Jose a nangdesinyo iti nasao a dekorasion.
Kkinunana nga iti panagrepasoda iti video footage a nairekord ti moving CCTV camera iti Upper Session Road ket awan iti nakitada a posible a nangsindi iti nasao a dekorasyon.
Nupay kasta, mamatida a naigagara ti panakauram ti nasao a Chritmas Tree gaputa awan ti naduktalanda a nadadael iti electrical wiring iti daytoy.
Manaig iti daytoy, umap-apelada kadagiti maseknan a nakakita iti insidente para iti dagus a panangipaka-ammo dagitoy iti otoridad iti posible a pakabigbigan dagiti responsable iti panag-uram.
Kabayatanna, binabalaw ni Silahis ng Pasko founder Narciso “Nars” Padilla dagiti naipatakder a Christmas Tree ditoy siudad a nailatangan iti dakkel a pondo ti lokal a gobyerno.
Kinunana a saan a rumbeng a makikompetensia ti siudad ti Baguio kadagiti dadduma a lugar manaig iti kinapintas dagiti dekorasion iti tunggal paskua a kasapulan nga aggastos ti gobierno para laeng iti artipisyal a Christmas Tree.
Insingasingna met a napimpintas laengen nga agsapol ti lokal a gobyerno kadagiti pudpudno a kayo ken maarkusan iti nagduduma a parol ken dekorasyon nga agserbi a Christmas Tree ti City of Pines.
Nupay kasta, impettengna a nasken a masalwadan ken mabantayan dagiti naipatakder a Chritmas Tree wenno aniaman a dekorasyon iti siudad tapnu saan a mauram ken madadael.
