BAGUIO CITY – Nagballigi ti tallo nga Igorot a mix martial artists bayat a napaay ti dua a kakaduada iti ONE: Global Superheroes a naangay sadiay Mall of Asia Arena idi laeng rabii.
Nakabales ni Igorot fighter Geje ‘Gravity’ Eustaquio iti remacth-da ken ni Kairat “The Kazakh” Akhmetov ti Kazakhstan iti main event babaen iti unanimous decision.
Iggem ita ni Eustaquio ti titulo kas ONE Championship Interim Flyweight World Champion ken addaan daytoy ti rekord a 10 wins ken 6 losses.
Addaan met itan ni Akhmetov iti 24 wins ken 2 losses.
Nagballigi met laeng ni Igorot fighter Joshua Pacio kontra ken ni Lan Ming Qiang ti China ti co-main event babaen iti rear naked choke.
Ibilbilang ni Pacio a nasam-it ti nasao a balligi gaputa agpada a babaen iti rear naked choke ti pannakaabak daytoy iti napalabas a labanna kontra kada Yoshitaka Naito ken Hayato Suzuki.
Nangabak met laeng ni Igorot fighter Edward Kelly kontra ken ni Meas Meu ti Cambodia iti preliminary card babaen iti knockout kalpasan laeng ti 21 a segundo iti umuna a rikos ti laban dagitoy.
Nupay kasta, naabak ti manongna a ni Eric Kelly iti laban daytoy ken ni Rafael Nunes ti Brazil babaen iti submission.
Napaay met laeng ni Igorot fighter April Osenio iti labanda iti padana a Pilipina a ni Jomary Torres babaen iti knockout iti umuna a rikos ti laban dagitoy.
Bin-ig a nagtaud dagiti lima nga Igorot MMA fighters iti nalatak a Team Lakay.
