Impanamnama iti Philippine Institute of Volcanology and Seismology (Phivolcs) nga awan iti maipaay a pangta ti napasamak a ginggined idiay Indonesia iti kasasaad iti Pilipinas partikular ti tsunami.
Idi laeng kalman, dinayyeg iti magnitude 6.5 a ginggined ti Papua province a nakaitunda iti panakadadael dagiti dinosdosena a babbalay ken pasdek idiay Indonesia.
Nupay kasta, awan ti kinumpirmar dagiti maseknan nga otoridad sadiay a pimmusay.
Mainaig iti dayta, impakaammo met iti Pacific Tsunami Warning Centre idiay Hawaii nga awan metlaeng ti pangta iti tsunami.
Maipalagip a kadagiti napalabas a lawas, immuna metten a napasaran dagiti nagduduma a lugar iti Pilipinas ti ginggined pakairamanan dagiti napipigsa a kas iti magnitude 6.9 idiay Bogo City, Cebu, magnitude 4.4 idiay La Union a narikna metlaeng iti Baguio-Benguet, ken ti magnitude 7.4 a dimmayyeg idiay Davao Oriental.
Iti baet nga awan ti pangta iti tsunami, inyunay-unay ti nasao a service institute iti publiko nga agridam ken agtalinaed nga alerto dagitoy.
