Inwaragawag ti Department of Health (DOH) nga amin nga agtawen ti siam a babbalasitang a kayatda ti umawat iti human papillomavirus (HPV) vaccine ket mabalinda a maaramid iti libre inton tawen 2025, kalpasan ti funding approval manipud iti gobierno.
Kinumpirmar daytoy ni Department of Health (DOH) Secretary Ted Herbosa.
Sigun kenkuana, kiniddaw ken inawatna ti pammalubos kenni President Ferdinand “Bongbong” Marcos Jr. a mangpondo ti bakuna ti HPV a makatulong a mangsalaknib kadagiti babbai manipud iti cervical cancer.
“Ang isang nahingi ko kay Presidente BBM ay pondohan na lahat ng 9-year-old girls for HPV vaccination. P4,000 po isang dose nito, two doses ito, at pumayag si BBM.”
“We are now funding, next year, 2025, all girls that want HPV vaccination.”
Department of Health (DOH) Secretary Ted Herbosa
Ti pondo ket mangbangon iti Bakuna-Eskwela initiative, maysa nga school-based nationwide vaccination program a nairugi idi Oktubre 7 babaen ti DOH ken ti Department of Education (DepEd).
Panggep ti programa a mabakunaan dagiti ubbing nga agis-eskuela kontra kadagiti vaccine-preventable diseases (VPDs) wenno sakit, a pakairamanan ti measles, rubella, diphtheria, tetanus, ken cervical cancer.
Ti programa ket mangikagumaan a mabakunaan iti agarup 3.8 milion a public school students iti Grade 1 agingga Grade 7 nga addaan ti measles-rubella ken tetanus-diphtheria vaccines.
Agarup siam a gasut a ribo a babbai a Grade 4 students iti napili a parapubliko a pagadalan ti puntiria a makaawat ti human papillomavirus (HPV) vaccine.
Manipod idi Disiembre a trese, dumanonen iti 505,010 Grade 4 students a babbai ti nakaawat ti human papillomavirus (HPV) vaccine.
