Impanamnama ni United States of America President Donald Trump a maipangruna ti pagsayaatan iti nasao a pagilian bayat ti administrasyonna ken ti panakaisubli daytoy kas maysa kadagiti mararaem a pagilian iti sangalubungan.
Bayat ti inagurasyon ken opisyal a panagsapatana para iti panagtakemna iti kinapresidente ita laeng nga aldaw, dinakamatna nga ipangruna daytoy ti panangbukel iti nadayaw, narang-ay, ken nawaya nga America nu sadino, maisubli kadagiti umili ti talek, demokrasya, ken ti waya dagitoy.
Iti panagbitla ni Trump, inaklonna a saan a nalaka ti nagdalanan daytoy iti tarigagayna nga agsubli iti takem nu sadino, sinublianna ti maatap nga assasination kenkuana bayat ti campaign rally nga impatungpalna idiay Pennsylvania.
Nupay kasta,mamati ni Trump nga insalakan daytoy ti Namarsua tapno adda ti mangidaulo iti panagbalin manen ti America a nasayaat ken narang-ay.
Kagiddan dayta, sumagmamano kadagiti imbinsa-binsa ni Trump a tarigagayna nga ipatungpal bayat iti administrasyonna ti panangisubli kadagiti criminal aliens a sumsumrek sadiay kadagiti lugar a nagtaudan dagitoy, pangala iti taripa ken tax kadagiti foreign sources imbes a kadagiti umili, panakaipaiyulog iti executive order a mangisubli iti freedom of speech, ken iti saan a mabayag ket panakasukat ti nagan a Gulf of Mexico iti Gulf of America.
Malaksid iti dayta, maideklara metlaeng iti National State of Emergency kadagiti borders iti nasao a pagilian.
Sigun kenni Trump, ti maikadua a panagtakemna ti mangmarka iti golden age iti America.//Bombo Rob Dominguez
