BAGUIO CITY – Konkondenaren ti grupo ti Bangads Motorcycle Club ti krimen nga inaramid ti maysa a miembroda iti uneg ti balay-paginuman idiay Leonard Wood Loop, Baguio City idi Disyembre 8.
Iti interview ti Bombo Radyo Baguio, kinuna ni Atty. Ryan Solano, Legal Counsel ti Bangads Motorcycle Club, makaaw-awat ti sibubukkel a grupo iti negatibo a komento manipud iti publiko gapu iti panagbagsol ti maysa a ka-grupoda iti maysa a lalaki a nangitunda iti ipupusay daytoy.
Maipalagip nga itay nabiit ket adda ti napasamak a gulo iti uneg ti balay-paginuman nu sadino pinadas ti biktima a ni Gibriel Vallejos Bangura, residente ti South Sanitary Camp, Baguio City nga aganawa kadagiti ag-aapa ngem binagsol daytoy ti suspek a ni Mark Angelo Espitula a nagresulta iti ipupusayna.
Sigun kenni Atty. Solano, saan a kankanunungan ti Bangads Motorcycle Club ti inaramid ti kagrupoda a ni Espitula rason nga inkarigatanda a kinasarita tapno boluntaryo a sumuko kadagiti otoridad.
Gapu iti daytoy, kidkiddawen ti Bangads Motorcycle Club iti publiko nga isardengda koma ti panangipaayda iti negatibo a komento iti sibubukkel a grupoda gapu ta ni laeng Espitula ti nakabasol ken saan a karaman dagiti dadduma a miembro ti grupo.
