BAGUIO CITY – Inruaren ti Department of Education ti guidelines para iti School Year 2022-2023 enrollment a mangrugin inton Hulyo 25 agingga Agosto 22.
Nilaon ti DepEd Order No. 35 dagiti guidelines para kadagiti school heads, mannursuro ken nagannak seknan iti baro a proseso ti panag-enroll.
Sigun iti guidelines, mabalin a maipatungpal ti enrollment babaen iti face to face, remote ken dropbox forms.
Para iti face to face enrollment, pisikal nga iproseso dagiti nagannak wenno estudyante ti enrollment form bayat ti panang-obserbarda iti minimum health ken safety standards.
Para iti remote enrollment, i-fill-out dagiti estudyante dagiti digital forms ken ipatulodda babaen iti official email address wenno aniaman a messaging platforms nga ipaay ti pagaladan a pag-enrollan dagitoy.
Para met iti dropbox enrollment, i-fill-out dagiti estudyante wenno nagannak dagiti forms iti pagtaenganda ken itinnag-da kadagiti drop boxes a naikabil iti pagadalan a pag-enrollan dagitoy.
Immunan nga inwaragawag ni Vice President ken Education Secretary Sara Duterte a maiyaplikar ti kombinasyon ti face to face classes ken distance learning manipud Agosto agingga Oktobre bayat a maiyaplikar ti lima nga aldaw a face to face classes inton Nobyembre.
Impetteng ni Duterte a natalgeden nga aglukat dagiti pagadalan gaputa nabayag metten a masursurot ti health protocols duwa a tawenen ti napalabas.
