Ikonkonsidera ti Department of the Interior and Local Government (DILG) ti pannakaidiaya ti gungguna para iti pannakaakestar ni Senator Ronald “Bato” dela Rosa.
Sigun kenni Department of the Interior and Local Government Secretary Jonvic Remulla, posible nga inkonsiderada ngem saan paylaeng epektibo iti agdama.
Innayona a manarimaan ti police operations iti intero a pagilian para iti pannakabiruk ni Sen. dela Rosa.
Impetteng ni Remulla a saan a nalaka ti pannangsapol iti Senador, nangruna ket dumanon iti 40,000 a barangay ti kasapulanda a pagbirukan.
Mainaig iti dayta, umap-apela ni Remulla kenni Dela Rosa a boluntaryo a sumuko ken impasiguradona a marespeto ti karbengan ti Senador.
Kabayatanna, kinompirmar ni Philippine National Police (PNP) chief Police General Jose Melencio Nartatez Jr. nga amin a posible a pagturungan ti Senador ket nainget a suksukimaten dagitoy.
