Naarestaren ita nga aldaw iti mapapati a gunman a nangpapatay iti broadcaster a ni Juan “DJ Johnny Walker” Jumalon idiay Dipolog City, Zamboanga del Norte babaen ti panagregget dagiti pannakabagi ti linteg.
Sigun iti Presidential Task Force on Media Security (PTFoMS), ti saan pay a nabigbig a gunman ket nakemmeg itay laeng parbangon babaen ti panagtinnulong ti puersa ti Misamis Occidental ken Zamboanga del Norte police.
Maipalagip a napapatay ti agtawen ti lima pulo ket pito a ni Jumalon idi Nobiemre idi napalabas a tawen bayat ti programana iti uneg ti pagtaenganna idiay Calamba, Misamis Occidental.
Nagturong ti suspek iti uneg ti pagtaengan ni Jumalon a nagpammarang nga adda ti napateg a maipablaak iti radio program daytoy ngem dagos a pinalpaltuganna ni Jumalon nu sadinno natamaan ti bibig daytoy pauneg iti likudan ti ulona.
Dagos met a naitaray ti biktima idiay Calamba District Hospital babaen ti pamilyana ngem naideklara a dead on arrival daytoy.
Idi bulan ti Marso iti agdama a tawen, immunan a naarestar ti dua kadagiti tallo a kakaduana a suspek.
Nabigbig dagitoy a da Boboy Sagaray Bongcawel ken Renante Saja Bongcawel.
