BAGUIO CITY – Nakasuan ti maysa a gwardiya gapo iti maatap a panangramesna iti maysa a balasitang sadiay Dontogan, Baguio City.
Nabigbig ti gwardiya a ni Noel Gidoc, adda iti legal nga edad ken residente ti Dontogan, Baguio City.
Maibasar iti report ti pulisya, napan ti balasitang iti pagtaengan ti suspek tapno makiay-ayam iti anak ti suspek.
Nupay kasta, idi simmangpet ti suspek iti pagtaenganda ket inawisna ti biktima iti silidna ken sadiay a ginundawayanna daytoy.
Naduktalan pay iti imbestigasyon ti pulisya a namiduan a rinames ti suspek ti biktima, partikular idi Oktubre 5 ken idi Oktubre 12.
Maibasar met iti medical examination iti biktima, nagsagrap ti balasitang iti dunor iti pribado a paset ti bagina.
Iti agdama, sumagsangon ti suspek iti nagtutuon a kaso.
