Nagipektibo ita ti indeklara ni President Ferdinand Marcos Jr. a national mourning iti ipupusay ni Pope Francis.
Sigun iti Presidential Communications Office (PCO), ipektibo daytoy angingga iti aldaw ti pannakaitabon ti nasao a Papa.
Gapu iti daytoy, ti bandera ti Pilipinas ket half-mast kadagiti amin a pasdek ken institusion ti gobierno iti pagilian ken iti ballasiw-taaw.
Kabayatanna, naituding a tumabuno ni President Ferdinand Marcos Jr. ken First Lady Louise “Liza” Araneta-Marcos iti pumpon ti Papa inton Sabado, April 26, 2025 idiay St. Peter’s Square.
Maipalagip a pimmusay ni Pope Francis idi Lunes, April 21 iti edad nga 88 gapu iti stroke ken irreversible heart failure.
Nagsagaba pay daytoy iti double pneumonia a rason iti pannakayospitalna iti adu a lawas.
