Pinilaanen ti Department of Justice (DOJ) idi Lunes ti kaso a qualified human trafficking ni sigud a presidential spokesperson Harry Roque.
Daytoy ket adda pakainaiganna iti operasion ti iligal a Philippine Offshore Gaming Operators (POGO) idiay Porac, Pampanga.
Kinuna ni Justice Undersecretary Nicholas Felix Ty a karaman kadagiti napilaan ti kaso da Cassandra Ong, Wu Duanren ti Whirlwind Corporation, Dennis Cunanan ken 30 a dadduma pay.
Innayon pay ni Ty a nalawag ti pakainaigan dagiti akusado a naaramat ti kompania para iti human trafficking.
Immunan a nangipila ti reklamo ti Presidential Anti-Organized Crime Commission (PAOCC) kontra iti Lucky South 99 authorized representative a ni Katherine Cassandra Li Ong ken dadduma pay.
Karaman metlaeng ni Roque iti supplemental complaint a naipila idi Oktubre 2024.
Sigun kenni Ty, numan pay abogado ti Whirlwind ni Roque ket personal daytoy a nagturong iti Philippine Amusement Gaming Corporation (PAGCOR) para iti renewal ti panagplikar ti Lucky South 99.
