Inwaragawag ni sigud a presidential spokesperson Atty. Harry Roque nga agaplikar daytoy iti asylum sadiay Netherlands para iti seguridad daytoy.
Daytoy ket gaputa adda ti posibilidad a mangipila ti Pilipinas iti extradition kontra kenkuana gapu iti pending arrest order daytoy manipud iti House Quad Committee.
Sigun kenni Roque, patienna a ti rason a pilpiltenda daytoy idi ket tapno maawanan iti legal representative ni sigud a President Rodrigo Duterte iti kasona iti International Criminal Court (ICC).
Maipalagip a karaman ni Roque kadagiti lima a Filipino accredited lawyers iti International Criminal Court ngem iti agdama ket saan pay a bigbigen ti ICC kas legal counsel ni Duterte.
Nupay kasta, ti agserserbi kas abogado ti sigud a Presidente a binigbig ti International Criminal Court ket ni Atty. Salvador Medialdea.
Impaganetget pay ni Roque a saan nga agawid daytoy iti Pilipinas a saanna a kadua ni sigud a President Duterte.
Iti sabali a bangir, inlawlawagna metlaeng a saan a mabalin nga agtakder kas abogado ni Vice President Sara Duterte para iti ama daytoy a ni sigud a President Rodrigo Duterte kas maitunos iti linteg.
