BAGUIO CITY – Nakemmeg ti maysa a High Value Individual iti insayangkat dagiti otoridad a buy-bust operation sadiay Bekes, Buyacaoan, Buguias, Benguet idi kalman.
Nabigbig daytoy a ni Felix Bomugao, 56-anyos, naasawaan ken residente ti Cotcot, Bangao, Buguias, Benguet.
Nakumpiskar kenkuana ti tallo a pakete a naglaon ti maatap a shabu nga agdagsen iti 1.7 grams ken aggatad ti nasurok Php 11,500.
Nakumpiskar pay kenni Bomugao ti nagduduma a drug paraphernalia ken ti cellphone a naaramat iti transaksionda iti operatiba bayat a narekober ti naaramat a buy-bust money.
Iti agdama, sumangsango ni Bomugao iti kaso a panaglabing iti Comprehensive Dangerous Drugs Act of 2002.
Sigun pay iti pulisya, ni Bomugao ket baro a miembro ti acytelene gang nga addaan iti operasyon iti amianan a Luzon.
