BAGUIO CITY – Nakemmeg ti maysa a High Value Individual iti naisayangkat a buy-bust operation sadiay Proper Puguis, La Trinidad, Benguet itay laeng nabiit.
Nabigbig daytoy a ni Leonardo Tocpil Biag Jr. alyas Onad, 20-anyos, baro, vegetable dealer, tubo ti Bauko, Mt. Province ken residente ti Bektey, Longlong, Puguis, La Trinidad, Benguet.
Nakemmeg daytoy kalpasan nga inlakona iti operatiba ti maysa a pakete ti maatap a shabu nga agdagsen iti 0.08 gram a mapattapatta nga aggatad ti P544.
Nakumpiskar pay iti ikotna ti maysa a pakete ti maatap a shabu nga agdagsen ti 0.04 gram bayat a narekober ti cellphone nga inaramatna iti transaksionda iti operatiba.
Sumangsango metten ni Biag Jr. iti kaso a panaglabsing iti Comprehensive Dangerous Drugs Act of 2002.
