BAGUIO CITY – Nakemmeg ti maysa a hold-upper kabayatan ti panang-hold-up-na iti maysa a balasang idi parbangon iti agdan sadiay Labsan-Kayang Street, Baguio City.
Nabigbig daytoy a ni Jessie Miranda Mendoza, 37 anyos, awanan asawa, tubo ti Isabela ken awanan ti address ditoy siudad bayat a ti biktima ket balasang a 26 anyos, empleyado ti gobyerno ken tubo ti Sabangan, Mt. Province.
Maibasar iti report, nagtaud ti biktima iti probinsia ken magmagna a paturong iti balay ti gayyemna idi nalabasanna ti nakatakder a suspek.
Sinurot ti suspek ti biktima ken sadiay a tinutukanna iti kutsilyo ti tengnged (neck) ti biktima kagiddan ti panangideklara daytoy iti hold-up.
Inted ti biktima ti kwarta ken cellphon-na iti suspek ngem naimatangan dagiti agpatpatrolya a pulis ti insidente isut gapuna a dagus a kinemmegda ti suspek.
