BAGUIO CITY – Pinagtutulongan a kinemmeg dagiti umili ken taxi drivers ti maysa a holdaper sadiay Irisan Dumpsite, siudad ti Baguio idi rabii.
Nabigbig ti suspek a ni Charlie Ventura, 39, ken residente ti San Luis Extension bayat a ti biktima ket ni Lizardo Puteng, 36, ken residente ti siudad ti Baguio.
Maibasar iti report ti pulisya, nagpara ti suspek iti Quirino Highway ken nagpaitulod sadiay Irisan Dumpsite.
Nupay kasta, idi simmangpetda iti nasao a lugar ket inruar ti suspek ti maysa a kartib ken intutokna iti biktima sakbay a nangideklara iti hold up.
Inala ti suspek ti P610 a cash iti center box ti taxi sakbay a rimuar ken timmaray a naglibas.
Dagus met a tinawagan ti biktima dagiti kakadwana a taxi driver babaen iti communication radio ken sinapolda ti suspek iti nasao a lugar iti panakitinnulong metten dagiti maseknan nga umili sadiay.
Iti panakiuman ti Bombo Radyo kenni SPO4 Joel Pay-an manipud iti BCPO Station 9, kinunana nga idi nariknan ti holdaper nga awan ti pagtarayanna ket nagpammarang daytoy a basurero ken nagawit iti sako a pagkabilan iti basura.
Nupay kasta, nairupaan daytoy ti biktima ken kinemmegda sakbay nga impaimada kadagiti pulis a nagresponde.
