BAGUIO CITY – Irekrekomendar ti mayor ti Sablan, Benguet kadagiti umili sadiay partikular dagiti addaan ti sintomas ti COVID-19 nga agpasidongda laengen ti home isolation.
Kasaruno daytoy ti panakairikep ti isolation facility ti munisipyo a masarakan sadiay Barangay Bayabas gapu iti manarimaan a panakatarimaan ti kalsada a paturong sadiay.
Sigun kenni Mayor Manuel Munar Jr., proyekto ti BLISST ti nasao a kalsada isut gapuna a kinasapulan a naiparikep ti isolation facility.
Kinunana a nakasagana met ti contigency plan ti munisipyo kontra iti pangta ti Omicron variant nangruna ta nakastreken ti nasao a virus iti Baguio City.
Innayonna a nakasagana met dagiti healthcare workers sadiay nga agresponde kontra iti agdama a pandemya ken agtultuloy ti panangipatungpalda ti panagbakuna kontra iti COVID-19 tapno mabakunaan dagiti saan paylaeng a nabakunaan.
Kagiddan iti daytoy, dinakamat ni Munar a 60% paylaeng ti nabakunaan nga umili sadiay Sablan nga adayo iti puntiryada a bilang tapno magun-od ti herd immunity sadiay.
Kabayatanna, impalagip pay ti mayor kadagiti umili sadiay Sablan, partikular dagiti agbibiyahe paturong sadiay La Union a nasken a mangiparangda ti negatibo a resulta ti RT-PCR test tapno saanda a mapasubli iti border checkpoint.
