BAGUIO CITY – Agtultuloy ti hot pursuit operation dagiti soldado kadagiti nakarangetda a kameng ti New People’s Army (NPA) sadiay Barangay Nunggulunan, Hungduan, Ifugao idi malem kalman.
Iti interview ti Bombo Radyo Baguio kenni Major Noriel Tayaban, dadaulo ti Public Affairs Office ti 5th Infantry Division (ID), Philippine Army (PA), kinunana a dumanon iti 15 a kameng ti Kilusang Larangang Guerilla MARCO Command ti Ilocos Cordillera Regional Committee ti CPP-NPA nga addaan operasyon sadiay Mountain Province ti naka-engkwentro dagiti kameng ti 54th Infantry Battalion, 5th ID, PA.
Kinunana a sakbay pay ti rinnupak ket naaddaan iti serye ti dayalogo ti tropa ti gobyerno kadagiti residente kadagiti babbarangay ti Busa, Namatec ken Napua sadiay Sabangan, Mountain Province iti sidong ti Retooled Community Support Program para iti nairtengan a panakaipatungpal ti Task Force to End Local Communist Armed Conflict (ELCAC).
Nagresulta daytoy iti panangited dagiti umili iti impormasyon iti militar seknan iti presensia dagiti armado a rebelde iti barangayda.
Gapu iti daytoy, dagus a nagaksion dagiti soldado a nagresulta iti panagbakwit wenno ipapanaw dagiti rebelde sadiay Sabangan, Mountain Province.
Maipalagip a naideklara a persona non grata dagiti kameng ti CPP-NPA sadiay Sabangan kagiddan ti nairtengan nga anti-insurgency program ti gobyerno.
Dinakamat ni Major Tayaban nga idi nakadteng dagiti rebelde sadiay Nunggulunan, Hungduan, Ifugao ket mismo a dagiti maseknan nga umili sadiay ti nangipulong iti militar iti presensia ti nasao a grupo.
Dagus met a nagresponde dagiti soldado a nagresulta iti engkwentro dagitoy.
Innayonna a kabayatan ti hot pursuit operation ita nga agsapa ket naaddaan manen iti engkwentro dagiti soldado ken dagiti rebelde sadiay Hungduan, Ifugao.
Imbilin metten ti Ifugao Provincial Police Office ti panakaisayangkat ti checkpoints iti amin a kalsada sadiay Hungduan, Ifugao.
Kabayatanna, nalaus met ti panagyaman ni BGen. Laurence Mina, commander ti 5th ID, PA kadagiti residente ken iti lokal a gobyerno ti Ifugao ken Mountain Province gapu iti agtultuloy a panakitinnulong ken panangitedda ti impormasyon iti lokasyon dagiti rebelde.
Kinunana a pammaneknek daytoy iti tarigagay dagiti umili nga agballigi ti kampanya tapnu magibusanen ti insurhensiya iti Cordillera ken Cagayan Valley.
