Kinumpirmar ti Presidential Anti-Organized Crime Commission (PAOCC) ita nga aldaw ti identidad ti mapapati a “boss of all bosses” ti Philippine Offshore Gaming Operators (POGOs) a paset ti kriminal nga aktibidad.
Sigun kenni PAOCC Executive Director Gilbert Cruz, ni Huang Zhiyang ti nasao a “boss of all bosses” ti POGO, nga addaan ti lima a pasaporte iti na-raid nga iligal a POGO idiay Clark, Pampanga.
Nupay kasta, saanna a makumpirmar ni siasinno ti indibidual a nangtulong kenni sigud a Bamban, Tarlac mayor Alice Guo a makalibas iti Pilipinas.
Sigun kenni Cruz, ni Huang ti nangtulong kenni Guo a makaala ti pagdagusan idiay Singapore.
Idi laeng Martes, kinuna ni Senador Jinggoy Estrada a ni Huang Zhiyang ti posible a ganganaet a nangtulong kenni Guo a makalibas iti Pilipinas.
Kabayatanna, ni Huang ket mapapati nga adda idiay Taiwan.
