Kidkiddawen manen dagiti sumagmamano a human rights groups iti Department of Justice (DOJ) nga ibasura ti Anti-Terrorism Act of 2020 ken Terrorism Financing Prevention and Suppression Act of 2012, innem a tawen kalpasan a naipatungpal ti Anti-Terror Law.
Iti naisayangkat a tignay-protesta, impaganetget ni Karapatan Secretary General Cristina Palabay a napaneknekan iti ballaagda a panaglabsing iti Constitution ken karbengan iti tao ti nasao a linteg.
Sigun kenni Palabay, nasurok 256 nga indibidual ti simmango iti mapapati a naaramid laeng a kaso ken pannakaibalud gapu iti panangipatungpal kadagiti nasao a linteg.
Kinunana a karaman kadagiti naapektaran dagiti mannalon, indigent, mangmangged, babbai, ken agtutubo.
Maipalagip nga idi Disiembre 2021, pinatibker iti Korte Suprema ti dakkel a paset iti Anti-Terrorism Act, ngem naideklara nga “unconstitutional” ti dua a probision daytoy.
