Nasentensiaan iti tungpal biag a pannakaibalud ti 50-anyos a lalaki, alyas “Jong,” kalpasan a napaneknekan a guilty wenno nagbasol iti kaso a panaglabsing iti Section 5 iti Article II iti R.A 9165 wenno ti Comprehensive Dangerous Drugs Act of 2022 itay nabiit.
Namulta metlaeng ti suspek iti P500,000.
Ni alyas “Jong” ket mabigbigbig a High Value Target, sigud a call center agent ken residente iti Trancoville, Baguio City.
Nakumpiskar manipod kenkuana iti 150 a gramo iti shabu nga addaan iti SDP a P1,020,000 babaen ti naipatungpal a buybust operation.
Natiliw ni Jong idi Hulio 2025 idiay Pinsao Pilot, Baguio City babaen iti RSET iti PDEA CAR.
Kabayatanna, iti impormasion a naala iti Bombo Radyo Newsteam, ti suspek ket karaman metlaeng iti nagduduma a kaso.
Natakuatan a maysa pay daytoy a gunrunner.
Iti criminal records, natiliw ti suspek idi tawen 1992 idiay Chicago gapu iti saan a nainkalintegan a panagaramatna iti paltog babaen iti Chicago Police.
Naiserbi ti sentensiana sakbay a nadeport daytoy iti Pilipinas.
Malaksid iti dayta, naikkat pay ti panagbalinna US citizen daytoy.
Idi tawen 2014, natiliw manen idiay Caloocan City gapu iti kasona a homicide, bayat nga idi tawen 2022, natiliw manen iti met siudad ti Baguio gapu iti panaglabsingna iti RA 9165 ngem na-acquit ti kasona.
Nupay kasta, idi July 16, 2025, natiliw manen gapu iti panaglabsingna iti RA 9165 ken rimmuar a “guilty” wenno napaneknekan a nagbasol babaen iti panagtingiting ni Hon. Emmanuel Cacho Rasing, Presiding Judge ti Regional Trial Court Branch 3. | via Bombo Noveh Organo
