BAGUIO CITY – Nainget ti panagsagana ita ti Ifugao boxing sensation a ni Kurvin John (KJ) Natuplag para iti umadanin a labanna inton April 6 sadiay La Trinidad, Benguet.
Naamuan nga agsansanay ti agdama a Philippine Boxing Federation Featherweight Champion iti Highland Boxing Gym sadiay La Trinidad.
Sigun kenni boxing promoter Darwin Miller Dep-ay, makabalubal ni Natuplag ti boksingero manipud Paranaque City a ni Ronnie Campos para iti bakante nga Oriental and Pacific Boxing Federation (OPBF) Youth Featherweight Title.
Kinunana a no mangabak ni Natuplag ket posible a maipaayan ti boksingero iti gundaway a makibalubal iti regional belt iti ruar ti pagillian.
Ti 21-anyos a ni Natuplag a tubo ti Lagawe in Ifugao ket addaan iti unbeaten record a 6 wins nga addaan 5 knock outs bayat a ti 21-anyos a ni Campos ket addaan met iti rekord a 7 wins, 3 draws ken 2 losses nga addaan ti 4 knock outs.
Agsango dagiti dua nga up and coming boxers iti Laban Pinoy 5 a maangay iti La Trinidad Municipal Gym a paset ti Strawberry Festival.
Agserbi met a co-headline ti laban ni sigud a WBC Oriental Bantamweight Champion Dayer Gabutan manipud Besao, Mt. Province.
