![](https://img.bomboradyo.com/baguio/2019/07/cropped-Ifugao-PNP-1.jpg)
BAGUIO CITY – Nabigbig ti Ifugao Police Provincial Office kas over-all champion iti kaleppas a 2nd Regional Civil Disturbance Management (CDM) Competition ti Police Regional Office Cordillera (PROCOR) a naangay sadiay Camp Bado Dangwa, La Trinidad, Benguet.
Pinasetan daytoy ti amin a police provincial offices, ti Baguio City Police Office (BCPO) ken ti Regional Mobile Force Battalion 15 (RMFB 15).
Naipasidong dagiti partisipante iti tallo a phase iti nasao a kompetisyon, pakairamanan ti panangipakitada iti walo a Basic CDM Formations ken ti panangiyaplikar dagitoy iti umno a formations ken procedures kadagiti partikular a sitwasyon.
Sigun iti PROCOR, impakita dagiti partisipante ti degree ken lebel ti kinasagana, kina-epektibo ken kinapartak ti panagrespondeda iti nagduduma a threat groups kabayatan ti emerhensiya kagiddan ti panangipakitada iti maximum tolerance.
Tinawen a maisaysayangkat ti kompetisyon iti CDM tapnu masukimat ken masubok ti kinasagana, equipage ken kapabilidad dagiti CDM Units ti PROCOR iti panagaksionda kadagiti tignay protesta ken dadduma a panagriribuk iti publiko nga agkasapulan ti panagresponde dagiti pulis.
Impaay met ni PBGen Dickson ti Medalya ng Kasanayan iti Ifugao PNP gapu iti panagbalinda a kampeon bayat a naipaay ti Medalya ng Papuri iti RMFB 15 gapu iti pananggun-odda iti maikadua a pwesto ken ti BCPO gapu iti pananggun-odda iti maikatlo a pwesto.
Kumpiyansa itan ni PBGen. Dickson a mabaelan dagiti pulis ti Cordillera a mangimaton iti civil disturbances iti masakupanda a lugar kas nakita iti nagbalin a performances dagitoy iti nasao a kompetisyon.