BAGUIO CITY – Nabigbig ken napadayawan ti maysa nga Igorot Army Officer kas Best Junior Officer ti Philippine Army sadiay South Eastern Mindanao kagiddan ti panakarambak ti maika-sangapulo ket lima nga anibersaryo ti 10th Infantry Division (ID) ti Philippine Army sadiay Mawab, Davao De Oro.
Nabigbig daytoy a ni First Lieutenant Felinger ‘Fel’ Catao, tubo ti Bokod, Benguet ken agserserbi a Triad Officer ti 39th Infantry Battalion (IB) a nakabase sadiay Makilala, North Cotabato.
Sigun kenni LtCol. Ezra Balagtey, commanding officer ti 39th IB, PA, nabigbig ni Catao gapu iti napateg nga akem daytoy iti panakaputar ken panakaimplementar dagiti inisyatibo para iti kappia ken panagdur-as a nagresulta iti panakapasayaat ti kasasaad ti seguridad iti masakupan ti battalion dagitoy.
Kinunana a dakkel a nakatulong ti naaramidan ni Catao iti panakaragpat ti pakabuklan a misyon ti 10th ID, PA a panakabukel ti maysa a nakappia nga aglawlaw sadiay South Eastern Mindanao a mangipaay dalan iti panagdur-as.
Naamuan pay a ni Catao ket nagturpos ti Bachelor of Science in Technology iti Benguet State University-Bokod Campus ken produkto ti Reserve Officer Training Corps ti nasao nga unibersidad sakbay a naayaban iti active duty iti regular force ti Philippine Army idi 2014.
Naipasidong ni Catao iti panagsanay tapnu agbalin nga opisyal agingga a naidestino sadiay Mindanao kas Platoon Leader ken nagbalin a Company Commander ti Charlie Company ti 39th IB idi 2017.
Impannakkel pay ni LtCol. Balagtey a napateg ti akem ni Catao iti panakaparmek ti pumigpigsa a panagrebelde sadiay Columbio, Sultan Kudarat a pakasarakan iti adu a kuta dagiti rebelde nga NPA babaen iti impatungpal ti Igorot Army Officer a culture and conflict-sensitive approach.
Innayonna nga agserserbi pay ni Catao kas maysa kadagiti focal persons iti implementasyon ti security, peace and development initiatives kadagiti regional boundaries ti Davao Region ken Soccsksargen iti abagatan ti Mindanao.
