BAGUIO CITY – Agsagsaganan ti Igorot mix martial arts fighter a ni Danny Kingad para iti labanna inton March 9 sadiay Kuala Lumpur, Malaysia iti ONE: Visions of Vistory.
Sigun kenni Team Lakay head coach Mark Sangiao, daytoy ket iti baet a nasukatan ti makasango ni Kingad iti kaudian a fight card ti ONE Championship a nairuar idi kalman, sumagmamano nga aldaw sakbay ti fight night.
Kinunana a matuloy latta ti laban ni Kingad ngem imbes a ni flyweight standout Gianni Subba ti makasango ti Igorot fighter, nagbalinen a ni Sotir Kichukov ti Bulgaria.
Dinakamatna a ti panagbaliw ti fight card ket intunda ti panagsanod ni ONE Championship flyweight titleholder Adriano Moraes manipud iti main event gapu iti nasagrapna a dunor iti tumeng.
Gapu iti daytoy, ni Subba ti nangsukat kenni Moraes ken sangwenna iti octagon cage ni Reece McLaren ti Autralia.
Iti agdama, imet ti up-and-coming Team Lakay flyweight a ni Kingad ti rekord a 5 wins, 1 loss bayat nga imet met ni Kichukov ti rekord a 13 wins, 7 losses.
