BAGUIO CITY – Naituding a pugsaten ni Igorot mix martial arts veteran Eric ‘The Natural’ Kelly ti innem a nagsasaruno a panaka-abakna iti panagsublina manen iti uneg ti octagon inton June 15 iti ONE: Legendary Quest a maangay iti Baoshan Arena sadiay Shanghai, China.
Makasango ni Kelly ti Chinese mix martial artist a ni Niu Kang Kang iti featherweight division iti preliminary cards.
Naudi a nangabak ni Kelly idi October 2015 iti panagsangoda kenni Hiroshige Tanaka iti ONE: Tigers of Asia ken nangrugi ti panaka-abakna idi January 2016 iti ima ni Ev Ting iti panagsangoda iti ONE: Clash of Heroes.
Naabak pay ti 37-anyos iti ima da Narantungalag Jadambaa, Kotetsu Boku, Rafael Nunes, Tetsuya Yamada ken Won Il Kwon.
Iggem ita ni Kelly ti professional record a 12 wins ken 7 losses.
Kabayatanna, ni Niu ket 23-anyos a mix martial arts prospect nga addaan ti professional record a 5 wins ken 1 loss.
Nagballigi daytoy iti panag-debut-na iti ONE Championship kalpasan nga inabakna ti beterano manipud Indonesia a ni ‘The Terminator’ Sunoto.
