![](https://img.bomboradyo.com/baguio/2019/12/malecdan.jpg)
BAGUIO CITY – Impasigurado ti Igorot police officer ti panagbalinna a patas iti panagserbina kas referee iti maangay a kickboxing competition iti agtultuloy a 2019 SEA Games a maang-angay ditoy pagilian.
Iti eksklusibo a panakiyuman ti Bombo Radyo kenni Police Senior Master Seargent Dare Malecdan manipud Itogon Municipal Police Station, imbingayna a naimbitaran daytoy nga agserbi a referee iti biennial event, partikular iti kickboxing a maangay inton December 7 agingga December 9.
Kinunana a maysa daytoy kadagiti walo a kickboxing coaches iti Baguio City, Benguet, Mountain Province ken Ifugao a nagseminar sadiay Manila ita a tawen para iti panagbalin dagitoy a national technical officials iti nasao a combative sport.
Ni Malecdan ket maysa a kickboxer ken wushu sanda practitioner nga agserserbi a kickboxing coach ti maysa nga unibersidad ditoy Baguio ken bronze medalist iti 4th World Wushu Championships a naangay sadiay Italy idi 1997 ken silver medalist iti wushu championship sadiay Myanmar idi 2002.
Nagserserbi pay daytoy a referee iti kickboxing events ditoy lokalidad manipud pay idi 1990s.
Kinunana nga awan ti awan ti agbalin nga isyu kas iti bias iti panag-referee-na nupay kaaduan a lumaban iti kickboxing para iti Team Pilipinas ket taga-Cordillera.
Dinakamatna a kadagsenan a makalaban dagiti kickboxers ti Pilipinas dagiti atleta ti Thailand ken Vietnam.
Inlawlawagna a dagiti atleta ti Thailand ket addaan iti normal nga striking a napateg iti kickboxing bayat a dakdakkel ti exposure met dagiti atleta ti Vietnam iti international competitions ti kickboxing nangruna ta dagitoy ti kaunaan iti Asya a nakilablaban iti international kickboxing events.
Nupay kasta, dakkel ti namnama ni Malecdan a makaala iti balitok a medalya dagiti kickboxers ti Team Pilipinas gaputa nakatutuk kadagitoy ni Team Lakay head coach nga agserserbi kas fight and striking coach dagiti nasao nga atleta.
Naituding nga ag-debut ti kickboxing iti 2019 SEA Games.