BAGUIO CITY – Naiyawiden ditoy rehiyon Cordillera ti bangkay ti Igorot a pulis a pimmusay iti buy-bust operation dagitoy sadiay Antipolo City.
Nabigbig daytoy a ni Patrolman Ariel Ingosan Dapyawen, 33-anyos, miyembro ti Intelligence Unit ti Antipolo PNP ken residente ti Tapapan, Bauko, Mountain Province.
Naamuan a nangisayangkat iti drug sting operation sadiay Sagipin, Dela Paz, Antipolo City ti pulisya kontra kadagiti agkabsat nga agpada a kameng ti maysa a gun-for-hire ken robbery group.
Sigun kadagiti otoridad, killaat a timmaray dagiti suspek kalpasan a nadlawda nga undercover ti dua a katransaksyonda, pakairamanan ni Patrolman Dapyawen.
Simrek dagiti suspek iti residential unit a mapapati a hideout dagitoy ken sadiay a pinaputukanda dagiti pulis a nagresulta iti namin-adu a daras a panakatama ni Patrolman Dapyawen ken nupay naitaray dagitoy iti pagagasan ket pimmusay daytoy bayat ti panakatamingna.
Intuloy a kinamat dagiti backup police officers dagiti suspek agingga a napapatay dagitoy iti nagsina a lugar.
Personal nga impaay ni PNP Chief Oscar Albayalde ti Medalya ng Kadakilaan ni Patrolman Dapyawen gapu iti kinabanuar nga impakitana.
Naamuan a naka-leave ni Patrolman Dapyawen ken agawid kuman iti probinsiya ngem pinili na ti makipaset iti nasao nga operasyon.
Naituding pay kuma a maital-o daytoy kas Police Corporal inton sumaruno a bulan.
