Naklaat ken nasdaaw dagiti researcher idiay Spain a mangisaysayangkat iti panagadal kadagiti pating bayat nga addada iti uneg ti danum idi kellaat a nagparang ti manmano nga agpakita nga ikkan a nabirngasan iti “Sea devil”.
Iti maysa a report, mangisaysayangkat ti panagadal iti paset ti Canary Islands dagiti researcher ti Non Government Organization (NGO) a Condrik Tenerife idi nagparang kadakuada ti maysa a Melanocetus johnsonii, a maaw-awagan a “sea devil” ken “black sea monster.”
Mapapati a ti panagvideo dagiti researcher iti ikkan a nabiag ken aglanglangoy ti kaunaan.
Kadawyan gamin a makitkita dagiti Melanocetus johnsonii iti uneg ti baybay nga addaan ti kauneg a 200-2,000 meters, a dandani saanen a madanon ti lawag ti aldaw.
Dagiti specimen wenno natay a kita ti nasao nga ikkan ti kadawyan a makitkita kadagiti museum.
Ti devil fish a naalaan ti video ket pimmusay metlaeng nga asideg iti surface ti baybay.
Inturong ti research team ti bagi ti naisangsangayan nga ikkan iti Museum of Nature and Archaeology tapno maadal daytoy.
Iti agdama, saan pay a nalawag nu apay a nagturong ti nasao nga ikan iti narabaw a paset ti baybay.
