BAGUIO CITY – Adu latta dagiti Pilipino a mabikbiktima iti human trafficking wenno human smuggling a maiturturong sadiay Iraq.
Iti eksklusibo nga interview ti Bombo Radyo Baguio kenni Philippine Embassy in Iraq Chargè d’Affaires Jomar Sadie, kinunana a kaaduan kadagiti biktima ti human trafficking sadiay Iraq ket agtataud iti Northern Luzon a pakairamanan dagiti lugar ditoy Cordillera kas sadiay Ifugao.
Kinunana nga iti laeng nabiit ket naipasidong iti repatriation ti 52 a Pinoy gapu iti nagduduma a parikot kas iti human trafficking.
Sigun kenkuana, adda met ti 14 a Pinoy sadiay a nagkiddaw a maipasidong iti repatriation gapu iti parikot a mapaspasaranda.
Dinakamatna a naipatungpal ti deployment ban sadiay idi pay 2014 ngem adu latta dagiti mabikbiktima iti illegal recquitment uray agtultuloy ti riribok sadiay Iraq.
Kinunana a gapu iti daytoy ket karkaro pay a naingetan ti koordinasion ti embahada ti Pilipinas iti gobierno ti Iraq tapno maduktalan no asino dagiti illegal recruiters.
Innayon ni Sadie a mapaspasayaat ti information campaign tapno agannad dagiti Pinoy kontra kadagiti illegal recruiter ken tapno maingetan ti screening iti Bureau of Immigrations.
Balbalakadanna met dagiti biktima ti human trafficking a saanda nga agliblibas iti balay ti amoda gapu ta delikado ti aglawlaw sadiay Iraq ken nasaysayaat no kasaritada ti amoda ken agpatulongda iti embahada.
Nagbalakad pay daytoy kadagiti agtartarigagay nga agturong iti ballasiw taaw nangruna kadagiti residente ti Northern Luzon nga agbalin dagitoy a naannad ken sukimatenda a naimbag no ligal ti pagturturonganda a recruitment agency.
Kinuna ti opisyal a dumanon iti nasurok 1,190 dagiti rehistrado nga OFWs sadiay Iraq ken nagarup 450 dagiti undocumented.
