BAGUIO CITY- Impetteng ti Department of Agriculture-Cordillera a nasken a dumalan iti umno ken legal a proseso ti maysa a security agency sakbay a mapalubosanda a sumrek iti masakupan ti Baguio Animal Breeding and Research Center (BABRC) a tagikua ti ahensia a masarakan iti baragay Dontogan ditoy Baguio City.
Iti eksklusibo a panakiyuman ti Bombo Radyo kenni DA-CAR Regional Director Cameron Odsey, kinunana a nasken nga ipila pay ti Dragon Knights Security Agency ti claims dagitoy iti korte.
Dinakamatna nga iti kanito a paboran iti korte ket sisasagana dagitoy a mangipaay iti kidkiddawen ti nasao nga organisasyon.
Nupay kasta, agingga a nabileg paylaeng ti Proclamation 603 a mangidekdelara a tagikua ti ahensia ti mapagin-inagawan a lote ket awan ti karbengan ti asinuman a pribado nga indibidual ken grupo a mangsakop iti daytoy.
Inaklonna pay a gapu iti pasamak ket nakaro a naapektaran ti operasionda iti BABRC nangruna ta armado ti grupo dagiti lallaki nga agturturong sadiay.
Iti baet daytoy, mangnamnama ni Odsey a marisot ti parikot iti kabiitan a panawen tapno maisubli kinatalged ti operasionda nangruna ta ado ti programa ken proyekto nga ar-aramiden ti ahensia sadiay.
Immunan a kinumpirmar iti Bombo Radyo ni Dontogan Punong Barangay Renato Bongcog Sr. ti presensia ti grupo iti nasao a lugar no sadino dinadaelda dagiti alad a naimuntar iti lote a pakaisaysayangkatan ti animal breeding ken nangikaliad pay iti nangikalida pay mohon.
Inaklon met ni Regional Civil Security Unit ti Cordillera PNP a ni PLTCOL Romeo Balubal Jr. nga awanan iti kaseknan a dokumento ken awtorisasyon ti nasao a Security Agency a maatap nga iligal nga immuneg iti sigud a naipasdekan ti Dairy Farm.
Gapu iti daytoy, a manamnama a maipaayan dagitoy iti violation ticket ken posible pay a sumangoda iti kaso nga administratibo kalpasan a naduktalan a saan a na-renew ti lisensiya dagitoy nga agoperate.
